مرحبا اخوان
شلونكم ؟
في هذا اليوم وبالتحديد استيقظت عائلة عراقية كانت نائمة من عام 1980
ونهضت هذا اليوم على حرورة اب اللهاب وبدهشة الجميع
وهذة العائلة من جماعة القديم
الأب : نهض من مكانة وتعجب وقال...
هاي شكو شصاير ناوشوني جكاير بغداد ابو الجيس عندي روحة للشغل
ثم نهضت البنت وشعرها موكفش وتحك برأسها وقالت...
ماما وينج عطشانة اريد بطل شابي وفريندو
ثم قام الأخ من مكانه وقال وين ادريسي مال فتاح نصّيف عندي لعبة اليوم ويه نادي الرشيد
واخيراً قامت الأم وقالت ...
هاي شبيكم تعيطون يمعودين ناوشوني العلاكة داروح السوق الثلاثاء اتسوك
فخرجوا من البيت جميعا واصابتهم الدهشة فيما يحصل بالعراق
فقال الأب وين سيارتي السوبر الـ80
فقال لهُ ابنه اخاف وره البيت بابا
فقال لهُ ابوه لك انجب ملعون البارحة بالليل طبكتهه بالحوش اخاف ابو تيسير اخذهه
فخابروا ابو تيسير على تلفونه الاأرضي فطلع تسجيل يكول
( الرقم الذي طلبتة قد مات قبل 17 سنة ارجوا الأتصال فيما بعد او زيارة قبره في الشواكه)
فتعجبوا جميعهم واصابهم الهرع وقامت البنت بالعياط
فركعتها امها براجدي ثم هرب الأبن الى الشوارع
بحثاً عن مكان هادئ يفكر فيه بما يحصل الأن
ثم تجمعوا جميعاً مرة اخرى وقال لهم الوالد : خل نتمشى شوية انشوف هاي شصاير
فتمشوا ثم رأوا سيطرة مال جيش : وقالت الوالدة
هاي يمكن اكو حرب شوكت نخلص من خميني ما اعرف !
فقالت البنت : بابا عفية وديني لأبو التسجيلات داشتري كاسيت حسين نعمة
ففاتت سيارة bmwفاتحين اغاني حسام الرسام
فقال الأبن يابه هذة حميد منصور شصاير بصوته
فقال الأب : اكو شي مدنعرفة لحد الأن ...
اني دخت من هذة الوضع هاي بغداد لو اني غلطان ؟
فتوجهوا الى زيونة الساعة الثامنة مساءاً
فشافوا ملعب الشعب يحتظن مباراة اربيل والزوراء
فقال الأب وكت اربيل يصعد نهائي اني اعرف اربيل جانوا اقوياء بطرك اللبن
فقال الأبن بابا بابا خل انزل للملعب اطك صورة ويه نعيم صدام
فقالت الأم ووياك طكلي صورة ويه فلاح حسن
فقالت البنت وهي خجولة : اذا شفتوا عامر عبد الوهاب سلمولي علّي ههههه
فرجعوا الى البيت والتعجب يسود وجوههم
فقابلوا السيدة ام عليوي وهي احد العشرة المبشرين بالنار
هلكد مجانت تكتل الجهال مال منطقة
فرأت هذة العائلة ثم تخربطت ارضاً
ثم ركض الوالد وقال ناوشوني دولكة مي اغسل وجهه هاي اام عليوي
فهرع الأبن بسطلة مي نوع نايلون قديم .. لون السطلة وردي
فترسها مي خابط ورشها على وجه ام عليوي
وصحت فازعة قصدي فزعانة وقالت
هاي وينكم .. فقالت لها الأماية ... احنة كبالج عيني احجيلنة شصاير ؟
فنزعت ربطتها ام عليوي وطلعت كصيبتها التي طولها 60 سنتمتر وقصت عليهم ما حدث
وقالت لهم عندا خلصت كلامها
كنتم نائمين في الأحداث وها انتم تستيقظون على واقع الحال
ثم ركضت العائلة الى البيت
وقام الأب ببيع سيارتة السوبر 80 وشراء همر
وقامت البنت بشراء كاسيت حسام الرسام ( بلاني )
وهرعت الأم لتذهب الى الصالون لعمل كوافيير لأنها سمعت العراقيين في سوريا يلهون ويلعبون
وفوك القهر انها انعجبت بتيسير السفير والأرض السعيدة والأب انعجب بدالي
وعاشوا عيشة سعيدة
باجر قصه جديده
يالله هسه نامو علمود تكعدون الصبح من وكت